ບົດກ່າວເປີດກອງປະຊຸມໃຫຍ່ຄັ້ງທີ IX ຂອງສະມາຄົມນັກຂ່າວແຫ່ງ ສປປ ລາວ
ວັນທີ 17 ກຸມພາ 2015 ທີ່ນະຄອນຫລວງວຽງຈັນ
ຂອງທ່ານ ສຈ. ດຣ. ບໍ່ແສງຄຳ ວົງດາລາ ກຳມະການສູນກາງພັກ, ລັດຖະມົນຕີວ່າການກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ, ປະທານສະມາຄົມນັກຂ່າວແຫ່ງ ສປປ ລາວ
ຮຽນ : ທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ ລັດຖະມົນຕີກະຊວງສຶກສາ ກິລາ, ຜູ້ຊີ້ນຳວຽກງານວັດທະນະທຳສັງຄົມ ທີ່ເຄົາລົບ ແລະ ນັບຖືຢ່າງສູງ.
ຮຽນ : ບັນດາສະຫາຍຜູ້ແທນ, ແຂກກອງປະຊຸມໃຫຍ່ທີ່ນັບຖື ແລະ ຮັກແພງ
ມື້ນີ້ໃນທາມກາງບັນຍາກາດທີ່ທົ່ວພັກ, ທົ່ວປວງຊົນລາວບັນດາເຜົ່າພວມຕັ້ງໜ້າບຸກ ບືນຈັດຕັ້ງປະຕິ ບັດມະຕິກອງປະຊຸມໃຫຍ່ຄັ້ງທີ IX ຂອງພັກ ແຜນພັດທະນາເສດຖະກິດສັງຄົມແຫ່ງລັດ ຄັ້ງທີ VII ແລະ ການຈັດຕັ້ງທົດລອງວຽກງານ3 ສ້າງ ໃຫ້ປະສົບຜົນສຳເລັດໃນທຸກຂົງເຂດວຽກງານເວົ້າລວມ, ເວົ້າສະເພາະ ໃນຂົງເຂັດວຽກງານ ຖວທ, ໂດຍໄດ້ຮັບອະນຸມັດຈາກກະຊວງພາຍໃນເຫັນດີໃຫ້ດຳເນີນກອງປະຊຸມໃຫຍ່ ຄັ້ງທີ IX ຂອງສະມາຄົມນັກຂ່າວແຫ່ງ ສປປ ລາວ ໃນມື້ວັນທີ 17 ກຸມພາ 2015 ເພື່ອພ້ອມກັນຕີລາຄາວຽກ ງານຂອງສະມາຄົມນັກຂ່າວໃນໄລຍະ 6 ປີ ຜ່ານມາ ຕັ້ງແຕ່ໄລຍະກອງປະຊຸມໃຫຍ່ຄັ້ງທີ VIII ຈົນ ເຖິງປະຈຸ ບັນ ແລະ ປຶກສາຫາລື ຕົກລົງຮັບຮອງເອົາທິດທາງແຜນການໃໝ່ສຳລັບສະໄໝທີ IX ເພື່ອສືບຕໍ່ ນຳພາວຽກ ງານຂອງສະມາຄົມນັກຂ່າວພວກເຮົາໃນຂັ້ນຕໍ່ໄປ.
ໃນກອງປະຊຸມທີ່ມີຄວາມໝາຍສຳຄັນໃນມື້ນີ້ຄະນະບໍລິຫານງານສະມາຄົມນັກຂ່າວ, ບັນດາຜູ້ແທນ ສື່ມວນຊົນຂອງກອງປະຊຸມທັງສູນກາງ ແລະ ທ້ອງຖິ່ນ ຮູ້ສຶກເປັນກຽດຢ່າງສູງທີ່ໄດ້ຕ້ອນຮັບ ທ່ານ ຄຳພັນ ວິພາວັນ, ກຳມະການກົມການເມືອງສູນກາງພັກ ຮອງນາຍົກລັດຖະມົນຕີຜູ້ຊີ້ນຳວຽກງານວັດທະນະທຳສັງ ຄົມທີ່ໄດ້ໃຫ້ກຽດສະຫລະເວລາອັນມີຄຸນຄ່າມາໂອ້ລົມຕໍ່ກອງປະຊຸມໃຫຍ່ຂອງສະມາຄົມນັກຂ່າວໃນມື້ນີ້ເພື່ອຊີ້ທິດເຍືອງທາງໃຫ້ບັນດາພະນັກງານສື່ມວນຊົນທັງພາກລັດ ແລະ ເອກະຊົນທຸກທົ່ວໜ້າທີ່ພວມປະຕິບັດ ໜ້າທີ່ອັນໜັກໜ່ວງ ແລະ ມີກຽດສະຫງ່າ ໃນສະໜາມຮົບແນວຄິດ ແລະ ວັດທະນະທຳຂອງພັກ ແລະ ລັດ ເຮົາ. ໃນນາມປະທານສະມາຄົມນັກຂ່າວ ຂ້າພະເຈົ້າຂໍກ່າວສະແດງໃຫ້ກຽດຕ້ອນຮັບຢ່າງສູງຕໍ່ ທ່ານ ຮອງນາ ຍົກລັດຖະມົນຕີ ຜູ້ຊີ້ນຳວຽກງານວັດທະນະທຳສັງຄົມຢ່າງສຸດອົກສຸດໃຈ.
ຈຸດປະສົງອັນຕົ້ນຕໍຂອງກອງປະຊຸມແມ່ນຈະໄດ້ສະຫລຸບຕີລາຄາວຽກງານໃນໄລຍະຜ່ານມາ ແລະ ມີ ຄວາມເປັນເອກະພາບໃນການວາງທິດທາງແຜນການໃນຕໍ່ໜ້າໃຫ້ມີໝາກຜົນໂຕຈິງຫລາຍຂຶ້ນເພື່ອສ້າງພື້ນຖານອັນໜັກແໜ້ນໃຫ້ແກ່ການພັດທະນາວຽກງານຂອງສະມາຄົມນັກຂ່າວໃຫ້ມີຜົນສຳເລັດຢ່າງຈົບງາມ.
ກອງປະຊຸມຍັງໄດ້ສະຫລຸບຕີລາຄາປະເມີນຜົນ ຈຸດດີ ຈຸດອ່ອນ ແລະ ແກ້ໄຂຂໍ້ຄົງຄ້າງຕ່າງໆ ເພື່ອຖອດ ຖອນບົດຮຽນແກ້ໄຂຂໍ້ຄົງຄ້າງເສີມຂະຫຍາຍຈຸດດີ ເພື່ອວາງແຜນພັດທະນາວຽກງານສະມາຄົມນັກຂ່າວໃນ 5 ປີ ຕໍ່ໜ້າກ້າວຂຶ້ນສູ່ຍາດກ້າວໃໝ່ດ້ວຍຜົນງານໃໝ່ ປະກອບສ່ວນຢ່າງຕັ້ງໜ້າເຂົ້າໃສ່ການຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງທີ IX ຂອງພັກ ປະກົດຜົນເປັນຈິງ.
ໃນນາມປະທານສະມາຄົມນັກຂ່າວຂ້າພະເຈົ້າຂໍປະກາດໄຂກອງປະຊຸມໃຫຍ່ຄັ້ງທີ IX ຂອງສະມາຄົມ ນັກຂ່າວແຫ່ງ ສປປ ລາວ ຢ່າງເປັນທາງການນັບແຕ່ເວລານີ້ເປັນຕົ້ນໄປ.