ໂຄງການ GAMCIL 2024-2025

ການລົງເກັບກຳຂໍ້ມູນ ໃນວັນທີ 29 ກໍລະກົດ – 13 ສິງຫາ 2025, ສະມາຄົມນັກຂ່າວ ແຫ່ງ ສປປ ລາວ, ອົງການແຄຣ໌ ລາວ ແລະ ຊ່ຽວຊານດ້ານການເກັບກຳຂໍ້ມູນ ໄດ້ລົງເກັບກຳຂໍ້ມູນໃນພື້ນທີ່ເປົ້າໝາຍຂອງໂຄງການທີ່ແຂວງ ຫຼວງພະບາງ ເຊິ່ງມີຜູ້ເຂົ້າຮ່ວມ 21 ຄົນ, ຍິງ 8 ຄົນ, ແຂວງ ຈຳປາສັກ 16 ຄົນ, ຍິງ 10 ຄົນ ແລະ ນະຄອນຫຼວງວຽງຈັນ 28 ຄົນ, ຍິງ 18 ຄົນ. ນອກຈາກນັ້ນ, ຍັງໄດ້ເຮັດເປັນລິ້ງແບບສອບຖາມອອນລາຍ ເພື່ອສົ່ງໃຫ້ແກ່ຜູ້ເຂົ້າຮ່ວມທີ່ຢູ່ຕ່າງແຂວງ ເພື່ອໃຫ້ທຸກຄົນໄດ້ມີສ່ວນຮ່ວມໃນການປະເມີນໄລຍະກາງຂອງໂຄງການ. ພາຍຫຼັງທີສຳເລັດການເກັບກຳຂໍ້ມູນ, ຊ່ຽວຊານເກັບກຳຂໍ້ມູນຈະໄດ້ເຮັດບົດລາຍງານ ແລະ ສະຫຼູບຜົນຂອງການປະເມີນໄລຍະກາງຂອງໂຄງການ ເຊິ່ງຄາດວ່າຈະສຳເລັດໃນຕົ້ນເດືອນ ກັນຍາ 2025.

ໃນວັນທີ 28 ກໍລະກົດ – 1 ສິງຫາ 2025, ສະມາຄົມນັກຂ່າວ ແຫ່ງ ສປປ ລາວ ແລະ ອົງການແຄຣ໌ ລາວ ຈັດຊຸດຝຶກອົບຮົມການລາຍງານຂ່າວບັນຫາສີຂຽວ ໃຫ້ແກ່ ອົງການຈັດຕັ້ງສັງຄົມລາວ ພາຍໃຕ້ໂຄງການ GAMCIL ທີ ນະຄອນຫຼວງວຽງຈັນ. ມີຜູ້ເຂົ້າຮ່ວມ 40 ຄົນ, ຍິງ 21 ຄົນ ຈາກ ນະຄອນຫຼວງວຽງຈັນ, ແຂວງ ບໍ່ແກ້ວ, ອັດຕະປື, ຊຽງຂວາງ ແລະ ຈຳປາສັກ. ຈຸດປະສົງກໍແມ່ນເພື່ອ ເພີ່ມຄວາມຮູ້ໃນການລາຍງານຂ່າວກ່ຽວກັບບັນຫາສິ່ງແວດລ້ອມ​ ເພື່ອຊ່ວຍໃຫ້ສາມາດສ້າງເນື້ອຫາ ກ່ຽວກັບການພັດທະນາສີຂຽວໄດ້ຢ່າງລະອຽດ, ການໃຫ້ຄວາມຮູ້ຈັນຍາບັນນັກຂ່າວ, ຄວາມສຳຄັນຂອງບົດບາດທາງເພດ ແລະ ສິດທິ ໃນຍຸກດິຈີຕອນ, ການນຳໃຊ້ເຄື່ອງມືດິຈີຕອນໃນການຜະລິດເນື້ອຫາ ແລະ ການເຜີຍແຜ່ເນື້ອຫາອອກສູ່ສັງຄົມອອນລາຍໃຫ້ມີຄວາມປອດໄພ.ຜົນໄດ້ຮັບແມ່ນສາມາດຜະລິດເນື້ອຫາທີ່ເປັນໂປສເຕີ້ ແລະ ວິດີໂອ ທີ່ຕີດພັນກັບບັນຫາສີຂຽວ, ສາມາດຜະລິດເນື້ອຫາໂດຍການນຳໃຊ້ເຄື່ອງມືດີຈິຕອນເຂົ້າມາຊ່ວຍ ແລະ ນຳສະເໜີບົດໄດ້ຢ່າງມີປະສິດທິພາບ, ສັ້ນກະທັດຮັດ.

ໃນວັນທີ 23-25 ກໍລະກົດ 2025, ອົງການແຄຣ໌ ຮ່ວມກັບໂຄງການ GAMCIL ໄດ້ຈັດຝຶກອົບຮົມຄູຝຶກ ບົດບາດ ແລະ ຄວາມສະເໝີພາບທາງເພດ ທີ່ເມືອງວັງວຽງ, ແຂວງວຽງຈັນ ໂດຍມີຜູ້ເຂົ້າຮ່ວມທັງໝົດ 13 ຄົນ ຍິງ 5 ຄົນ. ຈຸດປະສົງກໍແມ່ນເພື່ອ ຊ່ວຍໃຫ້ຜູ້ເຂົ້າຮ່ວມເຂົ້າໃຈໃນວຽກງານບົດບາດທາງເພດຫຼາຍຂື້ນ. ຜ່ານການສົນທະນາກັນ, ຜູ້ເຂົ້າຮ່ວມສາມາດຮູ້ວິທີການສອນທີ່ເໝາະສົມຫຼາຍຂື້ນຜ່ານການທົດລອງຂື້ນສອນຕົວຈິງ ແລະ ສາມາດສ້າງແຜນການສອນ ເພື່ອນຳໃຊ້ເຂົ້າໃນການຝຶກອົບຮົມໄດ້. ຜົນໄດ້ຮັບແມ່ນພວກເຂົາມີບົດສອນເປັນຂອງຕົນເອງ ແລະ ສາມາດນຳໄປສອນຕໍ່ໃຫ້ກັບຜູ້ເຂົ້າຮ່ວມຂອງໂຄງການ ແລະ ເພື່ອນຮ່ວມງານຂອງພວກເຂົາໄດ້.

ຝຶກອົບຮົມວັນທີ 7-9 ກໍລະກົດ 2025, ໂຄງການ GAMCIL ໄດ້ຈັດການຝຶກອົບຮົມຄູຝຶກ ເພື່ອການສົ່ງຕໍ່ບົດຮຽນການລາຍງານຂ່າວບັນຫາສີຂຽວ ແລະ ວາງແຜນການຝຶກອົບຮົມ ໃຫ້ແກ່ພະນັກງານໂຄງການ ແລະ ສະມາຄົມນັກຂ່າວ ແຫ່ງ ສປປ ລາວ. ມີຜູ້ເຂົ້າຮ່ວມທັງໝົດ 13 ຄົນ, ຍິງ 4 ຄົນ. ເຊິ່ງມີຕົວແທນຜູ້ເຂົ້າຮ່ວມໂຄງການຈາກແຂວງ ຫຼວງພະບາງ ແລະ ຈຳປາສັກ.ຈຸດປະສົງເພື່ອຊ່ວຍໃຫ້ຜູ້ເຂົ້າຮ່ວມໄດ້ມີທັກສະການເປັນຄູຝຶກທີດີ, ເພື່ອຊ່ວຍໃຫ້ສາມາດນຳໃຊ້ເຄື່ຶອງມືດິຈີຕອນໄດ້ດີຂື້ນ ແລະ ເພື່ອຊ່ວຍໃຫ້ສາມາດສ້າງແຜນການຝຶກອົບຮົມຂອງຕົນເອງ ຜ່ານການທົດລອງຂື້ນຝຶກຕົວຈິງ.

ໃນວັນທີ 30 ມິຖຸນາ – 4 ກໍລະກົດ 2025, ສະມາຄົມນັກຂ່າວ ແຫ່ງ ສປປ ລາວ ແລະ ອົງການແຄຣ໌ ລາວ ໄດ້ຈັດການຝຶກອົບຮົມໃຫ້ແກ່ ຜູ້ນຳໃຊ້ສື່ອອນລາຍຕົນທົ່ວໄປ ພາຍໃຕ້ໂຄງການ GAMCIL ມີຜູ້ເຂົ້າຮ່ວມທັງໝົດ 39 ຄົນ, ຍິງ 25 ຄົນ, ຜູ້ເຂົ້າຮ່ວມຈາກຫຼວງພະບາງ 3 ຄົນ ແລະ ຈຳປາສັກ 1 ຄົນ ເປັນຍິງທັງໝົດ.ຈຸດປະສົງຂອງການຝຶກອົບຮົມກໍແມ່ນເພື່ອຊ່ວຍໃຫ້ຜູ້ເຂົ້າຮ່ວມມີຄວາມເຂົ້າໃຈຫຼາຍຂື້ນຕໍ່ກັບບັນຫາສິ່ງແວດລ້ອມ ທີ່ເກີດຂື້ນ, ເພື່ອຮຽນຮູ້ການສ້າງເນື້ອຫາ ແລະ ເຕັກນິກການຜະລິດເນື້ອຫາຜ່ານເຄື່ອງມືດີຈິຕອນ, ເຂົ້າໃຈໃນຄວາມສຳຄັນ ຂອງຄວາມສະເໝີພາບທາງເພດຕໍ່ກັບການປ່ຽນແປງດິນຟ້າອາກາດ. ການສ້າງແຜນຜະລິດແຄມແປນ ກ່ຽວກັບການພັດທະນາສີຂຽວ. ພາຍຫຼັງສຳເລັດກໍໄດ້ຜະລິດເນື້ອຫາທີ່ເປັນທັງໂປສເຕີ້ ແລະ ວິດີໂອ ໂດຍນຳໃຊ້ສິ່ງທີ່ໄດ້ຮຽນມາເຂົ້າຊ່ວຍໃນການຜະລິດ.