ໂຄງການ GAMCIL 2026-2027

ໃນວັນທີ 29 ມັງກອນ 2026 ທີ່ຜ່ານມາ, ສະມາຄົມນັກຂ່າວລາວ ແລະ ອົງການແຄຣ໌ ລາວ ໄດ້ຈັດກອງປະຊຸມຮ່ວມກັບຜູ້ປະສານງານຂັ້ນແຂວງຈາກ ເຂດພຶ້ນທີ່ເປົ້າໝາຍຂອງໂຄງການ GAMCIL ເພື່ອເພີ່ມທະວີຄວາມເຂັ້ມແຂງໃນການຈັດຕັ້ງປະຕິບັດວຽກງານ. ກອງປະຊຸມໃນຄັ້ງນີ້ມີຈຸດປະສົງສຳຄັນ ຄື: ສະຫຼຸບຜົນງານ ແລະ ສິ່ງທ້າທາຍ ເພື່ອຮ່ວມກັນຕີລາຄາຄືນການຈັດຕັ້ງປະຕິບັດວຽກງານປະສານງານໃນໄລຍະຜ່ານມາ, ຍົກລະດັບການຮ່ວມມື ໃນການປັບປຸງກົນໄກການປະສານງານລະຫວ່າງພະນັກງານໂຄງການ GAMCIL ແລະ ຜູ້ປະສານງານຂັ້ນແຂວງ ໃຫ້ມີຄວາມຊັດເຈນ ແລະ ມີປະສິດທິພາບສູງຂຶ້ນ, ການແລກປ່ຽນບົດຮຽນ ລະຫວ່າງຜູ້ເຂົ້າຮ່ວມຈາກແຕ່ລະເຂດພຶ້ນທີ່ເປົ້າໝາຍ ໄດ້ແລກປ່ຽນປະສົບການຕົວຈິງນຳກັນ ແລະ ການວາງແຜນອະນາຄົດ ເພື່ອລາຍງານ ແລະ ປຶກສາຫາລືກ່ຽວກັບແຜນກິດຈະກຳ ຂອງໂຄງການທີ່ຈະຈັດຕັ້ງປະຕິບັດໃນສົກປີ 2026-2027.

ສະມາຄົມນັກຂ່າວລາວ ຮ່ວມກັບ ອົງການແຄຣ໌ ໄດ້ຮ່ວມກັນສ້າງຂະບວນການປູກຕົ້ນໄມ້ ທີ່ເມືອງສັງທອງ, ນະຄອນຫຼວງວຽງຈັນ. ກິດຈະກຳໃນຄັ້ງນີ້ ບໍ່ພຽງແຕ່ເປັນການເພີ່ມພື້ນທີສີຂຽວເທົ່ານັ້ນ, ແຕ່ຍັງເປັນການຮ່ວມມືກັນລະຫວ່າງ ສື່ມວນຊົນ, ຕົວແທນນ້ອງໆຜູ້ນຳໃຊ້ສື່ອອນລາຍ ແລະ ອົງການຈັດຕັ້ງທາງສັງຄົມ ເພື່ອຂັບເຄື່ອນເປົ້າໝາຍການພັດທະນາແບບຍືນຍົງ ຂອງ ສປປ ລາວ. ການປູກຕົ້ນໄມ້ໃນມື້ນີ້ ຄືການເພີ່ມພື້ນທີ່ສີຂຽວ ທີ່ຈະເຕີບໃຫຍ່ໄປພ້ອມກັບອະນາຄົດຂອງເດັກນ້ອຍລາວ ໃຫ້ໄດ້ຢູ່ໃນສະພາບແວດລ້ອມທີ່ສົດໃສ ແລະ ປອດໄພ.

ເຊົ້າມື້ນີ້ ວັນທີ 07 ມິຖຸນາ 2026 ສຳລັບກິດຈະກຳ “ເພື່ອນຊ່ວຍເພື່ອນ” ຂອງໄວໜຸ່ມພາກໃຕ້ ທີ່ນະຄອນປາກເຊ, ແຂວງຈຳປາສັກ ເຊິ່ງຈະຈັດຂຶ້ນເປັນເວລາ 02 ວັນເຕັມ ໃນລະຫວ່າງວັນທີ 07-08 ມິຖຸນາ 2026. ໂດຍຮ່ວມເປັນປະທານໃນພິທີໂດຍ ທ່ານ ປອ ວັນນະລາ ສຸດທິຈັກ ຮອງຫົວໜ້າຄະນະໂຄສະນາອົບຮົມເເຂວງ ຈໍາປາສັກ ແລະ ທ່ານ ນາງ ບົວຄໍາ ດວງປັນຍາ ຫົວໜ້າໂຄງການ GAMCIL, ປະຈໍາ ອົງການ ເເຄຣ໌ ນານາຊາດ ປະຈໍາ ສປປ ລາວ. ກິດຈະກຳໃນຄັ້ງນີ້ ເປັນການເຕົ້າລວມຂອງໄວໜຸ່ມຈິດອາສາທີ່ຈະມາຮຽນຮູ້ ແລະ ເເລກປ່ຽນເຊິ່ງກັນ ເເລະ ກັນ ເພື່ອວຽກງານຂອງສັງຄົມ ຜ່ານ 3 ຫົວຂໍ້ຫຼັກ ດັ່ງນີ້: ການຮັກສາສິ່ງແວດລ້ອມ: ຮຽນຮູ້ການປົກປັກຮັກສາທຳມະຊາດຢ່າງຖືກວິທີ. ບົດບາດທາງເພດ: ສົ່ງເສີມຄວາມສະເໝີພາບ ບໍ່ວ່າເພດໃດກໍສາມາດເປັນຜູ້ນຳ ແລະ…

ຄວາມສະເໝີພາບທາງເພດ ແລະ ການຮັບມືກັບສິ່ງແວດລ້ອມ ແມ່ນເລື່ອງຂອງທຸກຄົນ! ຫຼ້າສຸດນີ້, ທີມງານຄູຝຶກຈາກໂຄງການ ແກມຊິວ (GAMCIL) ປະຈຳແຂວງຈຳປາສັກ ແລະ ແຂວງສາລະວັນ ທີ່ໄດ້ຜ່ານການຝຶກອົບຮົມສ້າງຂີດຄວາມສາມາດມາຢ່າງເຂັ້ມງວດ, ໄດ້ຮ່ວມແຮງຮ່ວມໃຈກັນຈັດຊຸດຝຶກອົບຮົມ ແລະ ຖ່າຍທອດຄວາມຮູ້ຢ່າງເປັນຂະບວນຟົດຟື້ນ ໃຫ້ແກ່ກຸ່ມໄວໜຸ່ມຈິດອາສາ ພາຍໃຕ້ຫົວຂໍ້: “ບົດບາດທາງເພດ ຕໍ່ການປ່ຽນແປງສະພາບດິນຟ້າອາກາດ”. ເພື່ອໃຫ້ເຫັນວ່າທຸກເພດທຸກໄວລ້ວນແຕ່ມີບົດບາດ ແລະ ເປັນກຳລັງຫຼັກທີ່ຂາດບໍ່ໄດ້ ໃນການບໍລິຫານຈັດການ ແລະ ຮັບມືກັບບັນຫາສິ່ງແວດລ້ອມ. ສິ່ງທີ່ໜ້າພາກພູມໃຈທີ່ສຸດແມ່ນ, ຜ່ານຂະບວນການຮຽນຮູ້ໃນຄັ້ງນີ້ ໄດ້ສະແດງໃຫ້ເຫັນຢ່າງຊັດເຈນເຖິງການປ່ຽນແປງ ໂດຍຜູ້ເຂົ້າຮ່ວມທຸກຄົນມີຄວາມຕື່ນຕົວສູງ, ກ້າສະແດງຄວາມຄິດເຫັນ ແລະ ສະແດງໃຫ້ເຫັນເຖິງສັກກະຍະພາບ ພ້ອມທັງຄວາມມຸ່ງໝັ້ນຢ່າງເຕັມສ່ວນ ທີ່ຈະກ້າວຂຶ້ນມາເປັນ “ຜູ້ນຳຮຸ່ນໃໝ່ໃນຊຸມຊົນ” ຂອງຕົນເອງ. ນີ້ຄືບາດກ້າວອັນສຳຄັນ ທີ່ພິສູດໃຫ້ເຫັນວ່າ ໄວໜຸ່ມເຮົາພ້ອມແລ້ວທີ່ຈະນຳເອົາບົດຮຽນ ແລະ ປະສົບການຕົວຈິງໃນຄັ້ງນີ້ ໄປຜັນຂະຫຍາຍ, ປ່ຽນແປງ ແລະ ຮ່ວມກັນປົກປັກຮັກສາສິ່ງແວດລ້ອມໃນທ້ອງຖິ່ນໃຫ້ເກີດຄວາມຍືນຍົງຢ່າງແທ້ຈິງ!

ວັນທີ 8 ມິຖຸນາ 2026 – ໃນເຊົ້າມື້ນີ້, ບໍລິເວນທາງຂຶ້ນ ແລະ ຈຸດຊົມວິວພູສະເຫຼົ້າ ນະຄອນປາກເຊ ໄດ້ເຕັມໄປກຸ່ມໄວໜຸ່ມຈິດອາສາຈາກ ໂຄງການ “ມື້ລະຖົງ” ແລະ ລາຍການວິທະຍຸ “ເປີດໃຈໄວໜຸ່ມ” ທີ່ພ້ອມພຽງຮຽງໜ້າກັນມາເຮັດກິດຈະກຳເກັບຂີ້ເຫຍື້ອ ເພື່ອຄືນຄວາມສະອາດງາມຕາໃຫ້ກັບສະຖານທີ່ທ່ອງທ່ຽວສັກສິດຄູ່ບ້ານຄູ່ເມືອງ. ນ້ອງໆ ທຸກຄົນຕ່າງມີເປົ້າໝາຍດຽວກັນ ຄື: “ຢາກເຫັນບ້ານເກີດຂອງພວກເຮົາສະອາດ ແລະ ເປັນລະບຽບຮຽບຮ້ອຍ”. ພາບຂອງການຊ່ວຍເຫຼືອກັນຢ່າງບໍ່ຮູ້ອິດຮູ້ເມື່ອຍໃນມື້ນີ້ ບໍ່ວ່າຈະເປັນຍິງ ຫຼື ຊາຍ, ໄວຮຽນ ຫຼື ໄວເຮັດວຽກ ໄດ້ສະແດງໃຫ້ເຫັນຢ່າງຊັດເຈນວ່າ: ບໍ່ວ່າເພດໃດ ຫຼື ກຸ່ມຄົນໃດ, ເຮົາທຸກຄົນລ້ວນແຕ່ເປັນບົດບາດຫຼັກສຳຄັນໃນການຮ່ວມລົງມືເຮັດໃຫ້ບ້ານເຮົາມີພື້ນທີ່ສະອາດ. ການປ່ຽນແປງຂອງສັງຄົມບໍ່ໄດ້ຂຶ້ນກັບໃຜຄົນໜຶ່ງ, ແຕ່ມັນເລີ່ມຕົ້ນຈາກພະລັງຄວາມສາມັກຄີ ແລະ ການລົງມືເຮັດແທ້ຂອງພວກເຮົາທຸກຄົນ. ຂໍຕົບມືຊົມເຊີຍ ໂຄງການມື້ລະຖົງ, ລາຍການວິທະຍຸເປີດໃຈໄວໜຸ່ມ ແລະ ນ້ອງໆ ອາສາສະໝັກທຸກຄົນ ທີ່ເປັນແບບຢ່າງອັນດີງາມ ແລະ ເປັນແຮງຂັບເຄື່ອນໃຫ້ສັງຄົມເຮົາໜ້າຢູ່ຂຶ້ນໃນເຊົ້າມື້ນີ້!