ໂຄງການ GAMCIL 2026-2027

ຄະນະຜູ້ແທນຈາກ ສະມາຄົມນັກຂ່າວແຫ່ງ ສປປ ລາວ ແລະ ຜູ້ເຂົ້າຮ່ວມໂຄງການ GAMCIL ຈາກແຂວງຫຼວງພະບາງ ກຳລັງເຂົ້າຮ່ວມກິດຈະກຳ “ການແລກປ່ຽນວັດທະນະທຳ ສຳລັບນັກຂ່າວລະດັບພາກພື້ນ ປະຈໍາປີ 2026” ທີ່ ເມືອງໄຮຟ່ອງ, ສສ ຫວຽດນາມ ໃນລະຫວ່າງວັນທີ 17-20 ມິຖຸນາ 2026 ເພື່ອຮ່ວມສະເຫຼີມສະຫຼອງ ວັນສື່ມວນຊົນປະຕິວັດຫວຽດນາມ ຄົບຮອບ 101 ປີ. ເຊິ່ງໃນປີນີ້ ສປປ ລາວ ກໍໄດ້ເຂົ້າຮ່ວມປະກອບສ່ວນແລກປ່ຽນວັດທະນະທຳຜ່ານການຮ້ອງເພງ ເຂົ້າໜຽວສຽງແຄນ ທີປັບແຕ່ງດົນຕີໂດຍນັກຂ່າວຈາກແຂວງຫຼວງພະບາງ. ທ່ານສາມາດຮັບຟັງຜົນງານດັ່ງກ່າວໄດ້ທີ: https://www.youtube.com/watch?v=qUmLK-t6DbQ

ວັນທີ 22-23 ມິຖຸນາ 2026 ຜູເຂົ້າຮ່ວມໄດ້ຝຶກອົບຮົມ ຫົວຂໍ້ “ບົດບາດທາງເພດໃນຍຸກດິຈີຕອນ” ເພື່ອການລາຍງານຂ່າວບັນຫາສີຂຽວທີ່ຮອບດ້ານ ໂດຍສະເພາະແມ່ນໄດ້ລົງເລິກກ່ຽວກັບ ບົດບາດທາງເພດ ແລະ ຄວາມຮຸນແຮງບົນພື້ນຖານທາງເພດ (GBV) ແລະ ຜົນກະທົບຂອງບົດບາດທາງເພດ ຕໍ່ກັບການປ່ຽນແປງສະພາບດິນຟ້າອາກາດ. ນອກຈາກນັ້ນ, ຜູ້ເຂົ້າຮ່ວມໄດ້ຮຽນຮູ້ ແລະ ເຈາະເລິກເຕັກນິກການນຳໃຊ້ AI ທີ່ທັນສະໄໝ ເຂົ້າໃນວຽກງານສື່ມວນຊົນຢ່າງຮອບດ້ານ ທີ່ນຳສະເໜີໂດຍ ທ່ານ ອາຈານ ທອງສິງ ສີວົງໄຊ, ອາຈານຈາກ ພາກວິຊາວິທະຍາສາດຄອມພິວເຕີ, ຄະນະວິທະຍາສາດທຳມະຊາດ, ມະຫາວິທະຍາໄລແຫ່ງຊາດ ໂດຍເນັ້ນໃສ່ດ້ານການຜະລິດສື່ ແລະ ສະຫຼຸບບົດຂ່າວ ເພື່ອຫຼຸດຜ່ອນເວລາ, ເພີ່ມຄວາມຊັດເຈນ ແລະ ກັ່ນຕອງຂໍ້ມູນໄດ້ໄວຂຶ້ນ, ການນໍາໃຊ້ສຽງພາກຂ່າວ ສ້າງສຽງພາກທີ່ເປັນທຳມະຊາດ, ມືອາຊີບ ແລະ ຫຼາກຫຼາຍຮູບແບບ, ການສ້າງພາບເຄຶ່ອນໄຫວ ປ່ຽນເນື້ອຫາຂ່າວທີ່ຊັບຊ້ອນ ໃຫ້ກາຍເປັນພາບເຄື່ອນໄຫວທີ່ເຂົ້າໃຈງ່າຍ ແລະ ໜ້າຕິດຕາມ ແລະ ຮຽນຮູ້ການປ້ອງກັນຂໍ້ມູນ ແລະ ເຮັດວຽກໃນສື່ສັງຄົມອອນລາຍຢ່າງປອດໄພ ແລະ ໝັ້ນໃຈ.

ໃນວັນທີ 29 ມິຖຸນາ 2026, ໂຄງການ GAMCIL ໄດ້ຈັດພິທີເປີດຊຸດຝຶກອົບຮົມຜູ້ນໍາໃຊ້ສື່ອອນລາຍທົ່ວໄປຢ່າງເປັນທາງການ ທີນະຄອນຫຼວງວຽງຈັນ. ເປັນກຽດເຂົ້າຮ່ວມງານໂດຍ ທ່ານ ສະຫວັນຄອນ ຣາຊມຸນຕຣີ, ປະທານສະມາຄົມນັກຂ່າວລາວ, ທ່ານ ນາງ ຮັນນາ ບາເທວ, ຫົວໜ້າແຜນງານ ອົງການແຄຣ໌ ນານາຊາດ ປະຈຳ ເຢຍລະມັນ ແລະ ທ່ານ ພໍ ເວເບີ, ຫົວໜ້າພະແນກພັດທະນາແຜນງານ ອົງການແຄຣ໌ ນານາຊາດ ປະຈຳ ເຢຍລະມັນ ພ້ອມດ້ວຍຜູ້ເຂົ້າຮ່ວມ ແລະ ສຳມະນາກອນເຂົ້າຮ່ວມຢ່າງພ້ອມພຽງ. ຊຸດຝຶກອົບຮົມໃນຄັ້ງນີ້ ມີຈຸດປະສົງສຳຄັນເພື່ອສ້າງຄວາມອາດສາມາດໃຫ້ແກ່ຜູ້ນຳໃຊ້ສື່ອອນລາຍທົ່ວໄປ ໃນການສ້າງເນື້ອໃນກ່ຽວກັບບັນຫາສີຂຽວຢ່າງມີຄຸນະພາບ, ການນຳໃຊ້ປັນຍາປະດິດ (AI) ເຂົ້າໃນວຽກງານສື່, ພ້ອມທັງສ້າງຄວາມເຂົ້າໃຈກ່ຽວກັບວຽກງານຄຸ້ມຄອງສື່ມວນຊົນ ແລະ ຍຶດໝັ້ນໃນຈັນຍາບັນນັກຂ່າວເປັນຫຼັກ. ນອກຈາກນີ້, ຍັງເນັ້ນໃສ່ການຜະລິດແຄມເປນກ່ຽວກັບສິ່ງແວດລ້ອມ, ບົດບາດທາງເພດ ແລະ ການສົ່ງເສີມການມີສ່ວນຮ່ວມໃນດ້ານສິ່ງແວດລ້ອມຂອງທຸກພາກສ່ວນໃນສັງຄົມ. ໃນມື້ດຽວກັນ, ຜູ້ເຂົ້າຮ່ວມກໍໄດ້ຮຽນຮູ້ກ່ຽວກັບຈັນຍາບັນນັກຂ່າວ ແລະ ການນໍາໃຊ້ພາສາລາວໃນສື່ໃຫ້ຖືກຕ້ອງ ທີ່ນຳສະເໜີໂດຍ ສະມາຄົມນັກຂ່າວລາວ, ພ້ອມທັງເຈາະເລິກເລື່ອງບົດບາດທາງເພດ…

ໃນວັນທີ 30 ມິຖຸນາ 2026, ສະມາຄົມນັກຂ່າວ ແຫ່ງ ສປປ ລາວ ຮ່ວມກັບ ອົງການ ແຄຣ໌ ລາວໄດ້ຈັດການຝຶກອົບຮົມ “ການຜະລິດເນື້ອໃນ ແລະ ເຜີຍແຜ່ຫຼັກສູດອອນລາຍ” ເທິງເວັບໄຊຂອງສະມາຄົມນັກຂ່າວ ຢູ່ທີ່ ສະຖາບັນ ລາວ-ຍີ່ປຸ່ນ, ນະຄອນຫຼວງວຽງຈັນ. ກິດຈະກຳຄັ້ງນີ້ມີຈຸດປະສົງເພື່ອເຜີຍແຜ່ ຫຼັກສູດການຮຽນຮູ້ດ້ວຍຕົນເອງ ເທິງເວັບໄຊຂອງສະມາຄົມ ທີຈະໄດ້ເຂົ້າເຖິງຄວາມຮູ້ການລາຍງານຂ່າວບັນຫາສີຂຽວ, ການນໍາໃຊ້ດິຈິຕອນເຂົ້າໃນການຜະລິດເນື້ອໃນ ກົດໝາຍສື່ມວນຊົນ, ການສ້າງແຄມເປນກ່ຽວກັບສິ່ງແວດລ້ອມ ສຳລັບໃຜທີ່ສົນໃຈພັດທະນາທັກສະສື່ມວນຊົນ ແລະ ເນື້ອໃນຍຸກໃໝ່: ສາມາດເຂົ້າໄປລົງທະບຽນ ແລະ เริ่มຮຽນໄດ້ຟຣີ ເທິງເວັບໄຊໄດ້ແລ້ວມື້ນີ້!  ເຂົ້າຮຽນເລີຍທີ່: https://www.laja.la/account-1/signup/?redirect_to=https://www.laja.la/account-1